Is é an Dr. Geoffrey Shannon an Rapóirtéir Speisialta ar Chosaint Leanaí i láthair na huaire. Tá go leor gradam bainte amach aige mar thoradh ar a chuid oibre sa réimse um chearta leanaí sa dlí teaghlaigh náisiúnta agus idirnáisiúnta. Áirítear orthu sin, Gradam do Shárphearsa na Bliana an JCI 2005, Gradam Canon Maurice Handy 2006 agus Gradam Dlí na hÉireann 2013. Tá 29 leabhar scríofa nó comhscríofa ag an Dr. Shannon, lena n-áirítear, an chéad mhór-leabhar de chuid na hÉireann ar an dlí a bhaineann le leanaí: Child Law.

Tá an Dr. Shannon ina shaineolaí i réimse na huchtála agus tá sé aitheanta ag leibhéal idirnáisiúnta. Mar shampla i Márta na bliana 2013, roghnaíodh é as painéal saineolaithe ar an dlí uchtála le hionadaíocht a dhéanamh ar an Council of Bars and Law Societies of Europe (CCBE) os comhair Choiste um Ghnóthaí Dlí an Aontais Eorpaigh.

Is Dlíodóir atá ag cleachtadh a gairme í Orlaith le saineolas ar leith sa dlí teaghlaigh. Tá taithí ollmhór ag Orlaith Traynor i réimse na huchtála mar go raibh sí ina Leaschathaoirleach ar an mBord Uchtála ar feadh roinnt mhaith blianta.

Is Breitheamh Cúirte Dúiche é Patrick atá ar scor, a rinne a chuid staidéir i mBaile Átha Cliath, Leyden agus Amstardam. Bhí sé ag obair ina Dhlíodóir a bhí ag cleachtadh a ghairme ar feadh 30 bliain sular ceapadh ina Bhreitheamh é. Bhí sé mar chomhalta den Bhord Uchtála roimhe seo agus ina Chathaoirleach ar chumann uchtála. Ceapadh é sa bhliain 2014 ina Fhaighteoir Rúnda don Gharda Síochána agus tá sé mar chomhalta ar Bhord My Legacy.ie. Bhí Patrick ina Eadránaí freisin ar feadh roinnt mhaith blianta agus ina Chathaoirleach ar Chuideachta Chuan Dhún Laoghaire.

Tá Anne ag obair ina síceolaí agus ina síciteiripeoir le trí bliana fichead. Bhí sí ag obair le leanaí agus le déagóirí agus le tuismitheoirí, teaghlaigh agus cúramóirí freisin i seirbhísí éagsúla oideachais agus meabhairshláinte. Tá spéis ag Anne agus tá tiomantas aici d’obair idirghníomhaireachta le tuiscint níos fearr ar riachtanais síceolaíochta daoine óga a chur chun cinn.

Tá Paul cláraithe ina oibrí sóisialta le taithí a théann siar 35 bliain i seirbhísí leanaí. Bhí líon post cleachtóra agus bainistíochta aige sna réimsí ar nós cosaint agus leas leanaí, cúram malartach, meabhairshláinte, easpa dídine, andúil agus uchtáil. Bhí Paul Harrison, a chuaigh ar scor le gairid ón nGníomhaireacht um Leanaí agus an Teaghlach, ina Stiúrthóir Beartais agus Straitéise ar an bhfoireann bainistíochta náisiúnta agus bhí freagracht foriomlán air as Seirbhís Náisiúnta Uchtála na Gníomhaireachta.

Tá Helen ina Comhollamh i Scoil na hOibre Sóisialta agus an Pholasaí Shóisialta, i gColáiste na Tríonóide, Baile Átha Cliath, áit ar léachtóir í sa chleachtas agus polasaí um chosaint leanaí do mhic léinn fochéime agus iarchéime. Rinne sí líon tionscadal taighde a bhí coimisiúnaithe ar chosaint leanaí a stiúradh, as ar fhoilsigh sí páipéir agus ailt piarmheasúnaithe. Níos déanaí fós, bhí sí ina comhúdar ar chaibidil dar teideal, 'Child Welfare and Protection in Ireland: Déjà Vu all over again?' in Social Work in Ireland, a d’fhoilsigh Palgrave sa bhliain 2015. Tá sí ina cathaoirleach ar an bPainéal Athbhreithnithe Náisiúnta a dhéanann imscrúdú ar bhás leanaí a raibh na seirbhísí um chosaint leanaí ar an eolas fúthu.

Is síciatraí leanaí agus ógánaigh atá ar scor í Margo. Bhí sí ina Stiúrthóir ar an tSeirbhís Measúnaithe agus Teiripe maidir le Drochúsáid Ghnéasach Leanaí St. Clare in Ospidéal Ollscoile na Leanaí, Sráid Temple ar feadh 10 mbliana agus ina Stiúrthóir Cliniciúil ar an tSeirbhís Idirchaidrimh maidir le Meabhairshláinte i Sráid Temple ar feadh roinnt mhaith blianta. Tá spéis ar leith aici i saincheisteanna a bhaineann le ceangal tuismitheora/linbh.